Tuttina betg: En l’ultim mument para il president american Donald Trump dad avair sa decidì da tuttina betg laschar publitgar il dossier cumplet tar il mazzament da John F. Kennedy l’on 1963. Raschun per quella decisiun duai esser stà tenor intgins collavuraturs da la regenza in squitsch considerabel dals servetsch secrets che temevan per lur funtaunas.
Actas vegnan publitgadas pir suenter l'examinaziun
L’archiv statal american vegn uschia anc betg a publitgar tut las actas ch’eran serradas enfin uss. Tenor infurmaziuns da l’uffizi dal president duain seguir anc ulteriuras actas.
Quai suenter che la polizia federala FBI ed il servetsch secret CIA hajan guardà tras las actas, tgeninas actas che possian vegnir publitgadas. I stettian a disposiziun anc 180 dis, per far quellas examinaziuns, è vegnì communitgà.
Il mazzament è dapi il 1963 basa per teorias da conspiraziun
Il mazzament da John F. Kennedy ils 22 da november 1963 a Dallas (Texas) pavla dapi lura las pli diversas teorias da conspiraziun. Ch’il president carismatic pudess be esser stà victima dad in solit assassin para enfin uss betg dad esser imaginabel.
Teorias paran dentant da restar teorias
Correspundentamain occupescha la publicaziun dals documents tar il mazzament er las lingias grassas da las medias enturn il mund.
Ils experts n’èn dentant betg uschia entusiastics: Tenor pliras medias na spetgian els betg, che tut las dumondas vegnian respundidas tras las actas publitgadas.
RR novitads 06:00
