Siglir tar il cuntegn
Inhalt

Exteriur May vul restar, malgrà desaster tar elecziuns

La primministra britannica Theresa May na vul sco i para betg sa retrair. Quai rapportan differents meds da massa. Suenter las elecziuns en Gronda Britannia resta la partida conservativa bain la pli ferma partida, la maioritad absoluta ha ella dentant pers, rapportan las agenturas da novitads.

La primministra Theresa May vegnia a restar er suenter il debachel da sia partida tar l'elecziun dal parlament. Pretendì che May sa retira aveva il schef da la partida socialdemocratica da Labour, Jeremy Corbyn. Theresa May vegn a s'exprimer avant giantar tar il desaster da sia partida.

Tgi cun tgi è la dumonda actuala

Ils Tories da May han pers sezs, la Labour da Corbyn ha gudagnà sezs – tuttina n'ha nagina da las duas partidas la maioritad absoluta per pudair furmar ina regenza. La situaziun actuala:

  • Labour sclaudia ina coaliziun cun ils conservativs. La partida veglia fundar ina regenza da minoritad, ha ditg in pledader da la Labour.
  • Il dretg da sondar sco emprima partida cun tgi furmar ina regenza è dentant anc adina tar May ed ils Tories, cunquai che sia partida resta malgrà las perditas la pli ferma.

La repartiziun dals sezs

Tenor l'emettur da televisiun britannic BBC n'ha la partida da Theresa May nagina schanza pli da cuntanscher la maioritad absoluta. Ils socialdemocrats da la partida da Labour vegnissan uschia sin 266 sezs e gudagnassan marcantamain.

Cun l’elecziun nova vuleva May atgnamain augmentar sia maioritad absoluta en la chombra dals deputads. Quai per survegnir dapli sustegn per las tractativas pertutgant il Brexit.

James Corbyn: Primministra Theresa May duai sa retrair

Il schef da la partida da Labour Jeremy Corbyn aveva pretendì gia la bun'ura, che la primministra Theresa May sa retiria. Sia argumentaziun: May duaja far plaz ad ina regenza socialdemocratica che represchentia propi tut la populaziun da la Gronda Britannia. Ils Brits hajan avunda da cesuras tar las expensas publicas ed er avunda d'in sistem da sanadad mal finanzià.

Theresa May sezza era anc precauta

La primministra sezza era s'exprimida la bun'ura suenter ils emprims resultads da l'elecziun dal parlament anc a moda precauta: La Gronda Britannia dovria ussa ina fasa da stabilitad. Sia partida conservativa saja anc adina la pli ferma partida. I saja perquai en lur cumpetenza da procurar per questa stabilitad, uschia May.

RR novitads 06:00