Siglir tar il cuntegn
cuntegn

Exteriur May survegn incumbensa da furmar regenza

La primministra britannica Theresa May ha survegnì da la regina Queen Elisabeth l'incumbensa per furmar ina nova regenza. Ella haja rinforzà sia intenziun da metter enturn la veglia dal pievel e bandunar l'Uniun europeica.

La primministra britannica, Theresa May vul cumenzar sco planisà ils 19 da zercladur cun las tractativas per bandunar l'UE. Ella vegnia a furmar uss ina nova regenza, ha ella ditg venderdi a Londra suenter ina audiziun tar la regina Elisabeth la segunda.

Quella regenza vegn a purtar a nus tschertezza ed a manar nus tras las tractativas dal Brexit.
Autur: Theresa MayPrimministra britannica

Per furmar ina nova regenza sto la partida da May ussa sa metter ensemen cun in'autra partida ed uschia survegnir in pli absolut. Sco favurit vala la partida da l'Irlanda dal nord, DUP. Tenor May sappian be la DUP ed ils conservativs porscher la segirezza necessaria al pajais.

Nus vegnin vinavant a lavurar ensemen fitg stretg cun noss partenaris, sur tut cun la DUP.
Autur: Theresa MayPrimministra britannica

May na vul sco i para betg sa retrair. Quai rapportan differents meds da massa. Suenter las elecziuns en Gronda Britannia resta la partida conservativa bain la pli ferma partida, la maioritad absoluta ha ella dentant pers, rapportan las agenturas da novitads. Pretendì che May sa retira aveva il schef da la partida socialdemocratica da Labour, Jeremy Corbyn.

La primministra fa quest pass perquai che che sia partida conservativa ha pers la maioritad absoluta en il parlament. Ils Tories han actualmain 318 dals total 650 sezs – il resultat d'ina regiun manca anc.

Resultat è in debachel per la primministra May

Il venderdi a bun'ura è resultà da l'elecziun, ch'avess stuì rinforzar la partida conservativa da la primministra, in veritabel debachel. En las elecziuns da parlament anticipadas ha la partida conservativa pers cleramain la maioritad absoluta.

Labour ha gudagnà marcantamain

Gudagnà marcantamain sezs ha percunter la partida socialdemocratica da Labour. Suenter ch'ils emprims resultads eran vegnids enconuschents il venderdi a bun'ura aveva il sche da la partida socialdemocratica Jeremy Corbyn pretendì, che la primministra sa retiria.
RR novitads 12:00