Il saxofonist e bandleader tudestg Max Greger è mort. Sco quai che la famiglia ha confermà a l'agentura da novitads tudestga dpa, è il musicist mort cun 89 onns da las consequenzas dal cancer en in ospital a Minca.
Mez fanadur aveva Greger anc dà in concert a Minca. 2 dis pli tard saja el vegnì en l'ospital ed haja survegnì la diagnosa da cancer.
Greger ha registrà passa 150 plattas e discs cumpacts e producì radund 3’000 tocs. En sia carriera è el stà sin tribuna cun stars mundials sco Louis Armstrong, Duke Ellington ed Ella Fitzgerald.
