Siglir tar il cuntegn

Header

Matta.
Legenda: Cunzunt en l'India ston bleras giuvnas maridar fitg baud. Keystone
cuntegn

Exteriur Maridaglias da mattas s'augmentan

Adina dapli mattas vegnan maridadas sco uffants. Da quai avertescha l'organisaziun dals dretgs d'uffants «Save the Children».

Quai resulta dad in rapport ch'è vegnì publitgà mardi a chaschun dal Di mundial da mattas. Tenor quest rapport datti sin l’entir mund il mument radund 700 milliuns dunnas e mattas che vivan en matrimonis ch'ellas èn idas en avant avair 18 onns.

L'onn 2050 pudess quai esser fin 1,2 milliardas dunnas, uschia stimescha l'organisaziun «Save the Children». Mintga set secundas vegn ina matta sut 15 onns maridada.

Consequenza negativas

Tenor il rapport vegnan mattas per part gia sa maridadas en ina vegliadetgna da 10 onns, uschia en pajais sco l'Afganistan, il Jemen, l'India u la Somalia. Talas maridaglias sajan l'entschatta d'in circul vizius da dischavantatgs. Las mattas pertutgadas perdian uschia il dretg fundamental sin scolaziun, svilup e sin dastgar esser uffant.

La pli auta quota da talas maridaglias ha tenor il rapport l'India. Là sajan 47% da las mattas sut 18 onns pertutgadas da questa pratica. L'exempel da la Nigeria demussia che cunzunt mattas ord famiglias paupras vegnian maridadas bler pli baud che lur contemporanas pli ritgas.

RR novitads 06:00