Marcantamain dapli dumondas d'asil en pajais ritgs

En ils stadis industrials hai dà l'onn passà las pli bleras dumondas d'asil dapi 22 onns, quai rapporta l'Ovra umanitara per fugitivs UNHCR.

Fugitivs da la Siria.

Legenda da maletgs: Pervi da las bleras guerras datti usché bleras dumondas d'asil. Keystone

Da las passa 860'000 dumondas d'asil sajan 170'000 vegnidas registradas en la Germania, quai èn in tschintgavel da tut las dumondas.

Guerras civilas

Il dumber da dumondas en ils stadis industrials saja creschì per 45% en cumparegl cun l'onn avant. Las raschuns sajan las guerras en la Siria ed en l'Irac ed ulteriurs conflicts violents en numerus pajais.

En proporziun cun il dumber d'abitants ha la Svezia ils pli blers requirents d'asil, suandà da Malta, Luxemburg, la Svizra ed il Montenegro.

RR novitads 7:00