Siglir tar il cuntegn

Header

cuntegn

Exteriur Mandat per 3. program d'agid per la Grezia sin via

Suenter il parlament austriac ed il «Bundestag» tudestg, ha ussa era il fond d'agid da l'Euro ESM approvà il mandat per ulteriur agid per la Grezia.

Il cussegl dal fond d'agid da l'Euro (ESM) ha dà glisch verda al mandat da negoziar cun la Grezia davart in 3. program d'agid. Las instituziuns vegnian ussa a tractar la cunvegna cun la regenza greca, communitgescha l'ESM. Parallel latiers elavuria il fond ina proposta per ina finanziaziun dal pajais per l'emna che vegn.

audio
Saira: Tge che spetga ils Grecs cun las novas refurmas
ord Actualitad dals 17.07.2015.
laschar ir. Durada: 5 minutas 6 Secundas.

Austria e Germania han gia approvà

Suenter il parlament austriac ha era il «Bundestag» ha approvà tractativas davart in terz program d'agid per la Grezia. In program da pliras milliardas euros. En ina sesida extraordinaria han 439 deputads en il parlament approvà il mandat per novas tractativas per in pachet d'agid e per ulteriuras finanziaziuns a curta vista. Cunter il mandat èn stads 119 deputads e 40 ulterius èn s'abstegnids.

Mandat per ulteriuras 86 milliardas euros

La regenza tudestga ha ussa il mandat da contrahar davart agid finanzial da fin 86 milliardas euros. Quai però adina cun las cundiziuns da refurmas detagliadas. Davart la cunvegna contrahada sto il «Bundestag» lura però decider in'ulteriura giada.

Bancas grecas avran puspè

Persunas attempadas spetgan avant ils eschs serrads d'ina banca greca.
Legenda: Davent da glindesdi duain tals maletgs avant las bancas grecas appartegnair al passà. Keystone

Suenter 3 emnas vegnan las bancas grecas puspè ad avrir glindesdi che vegn. Lura possian ils burgais puspè nizzegiar tut las pussaivladads, ha ditg il suppleant dal minister da finanzas, Dimitris Mardas. Vinavant saja dentant mo pussaivel da retrair 60 euros a di dals contos.

L'annunzia succeda suenter che la Banca centrala europeica aveva ditg, ch'ella vegnia ad augmentar l'agid d'urgenza per las bancas grecas. Quellas aveva la regenza greca serrà, per evitar in collaps dal sistem da bancas en vista a la crisa da daivets.

Relativà l'optimissem grec

I saja probabel che las bancas grecas avrian il glindesdi, ha ditg Christine Lagarde - la directura dal Fond monetar internaziunal IWF - ad in radio franzos. E tenor in commember dal cussegl da la Banca centrala europeica dovria dentant anc intginas examinaziuns.

RR Novitads 06:00 / 12:00 / 14:00 / 18:00

Artitgels legids il pli savens