Siglir tar il cuntegn
cuntegn

Exteriur Manaders da Cipra vulan reunir l’insla

Ils discurs da pasch per reunir la Cipra paran da purtar emprims fritgs suenter in onn. Il president da la Republica da Cipra Nicos Anastasiades e ses collega tirc-cipriot Mustafa Akinci han affirmà da vulair reunir l’insla ch’è dividida en nord e sid dapi il 1974.

L'insla mediterrana da Cipra.
Legenda: L'insla mediterrana da Cipra. google maps/screenshot RTR

L’insla dividida da Cipra duai vegnir reunida. Quai han affirmà il president da la republica Cipra e da la Republica Tirca da la Cipra dal Nord.

In onn suenter avair reprendì ils discurs da pasch scrivan els en ina communicaziun communabla ch’els veglian anc quest onn chattar ina schliaziun cumplaina.

Els hajan fatg «progress decisivs» ils ultims mais, i dettia dentant anc adina «problems e differenzas».

RR novitads 10:00

Renunir nord e sid

La Cipra è dividida dapi il 1974 suenter in putsch grec-cipriot ed in’intervenziun militara tirca. Dapi il matg da l’onn passà datti puspè discurs da pasch tranter la Republica da Cipra e la Republica da la Tirca Cipra dal Nord. L’ONU ha instradà il process da pasch e vesa en quel la meglra schanza per reunir la Cipra suenter dapli che 4 decennis.