Siglir tar il cuntegn
Inhalt

Exteriur Mali proclamescha stadi d'urgenza suenter ostagi en hotel

Suenter las attatgas da terror en in hotel da luxus a Bamako ha il president dal Mali, Boubacar Keita, proclamà il stadi d’urgenza per il pajais per 10 dis. Il venderdi eran mortas 21 persunas tar in’attatga d’extremists islamics en in hotel.

In policist maina en segirezza in dals ostagis dal hotel da luxus.
Legenda: In policist maina en segirezza in dals ostagis dal hotel da luxus. Keystone

Tenor indicaziuns da las forzas da segirezza èn 18 persunas vegnidas mazzadas tar l’attatga. Las duas gruppaziuns da terror Al-Murabitun ed Al-Kaida èn sa decleradas responsablas per l’attatga.

Ostagi è a fin

Ils terrorists islamists n’hajan nagins ostagis pli en lur pussanza, ha ditg il minister per la segirtad interna. Almain 18 persunas sajan vegnidas mazzadas. Davart las unfrendas na datti naginas indicaziuns il mument. Il Departament federal d'affars exteriurs n’ha naginas indicaziuns davart unfrendas svizras.

Er unitads spezialas franzosas ed americanas

Unitads spezialas franzosas da Paris sajan stadas participadas a l’acziun da deliberar ils ostagis. Il minister da defensiun franzos, Jean-Yves Le Drian ha ordinà l’acziun sin giavisch da las autoritads dal Mali. Era unitads spezialas dal Stadis Unids da l’America sajan stadas participadas a la deliberaziun dals ostagis.

170 ostagis

Nunenconuschents han attatgà oz l’avantmezdi in hotel da luxus a Bamako, la chapitala dal Mali. Els han prendì ostagi ils bun 140 giasts e 30 collavuraturs dal hotel. Sco quai ch’i para èn ils attatgaders entrads en il hotel cun numers diplomatics. Duas organisaziuns da terror muslimas han declerà d'avair fatg l'attatga. Quai è la Al-Kaida en il Maghreb islamic ed ina cella da la Kaida, la Al-Murabitun.

RR novitads 17:00 / 21.11.2015, 10:00