Siglir tar il cuntegn
cuntegn

Exteriur Maina Cottarelli l’Italia tar elecziuns novas?

Suenter l'inscunter cun Mattarella ha Carlo Cottarelli declera avant las medias da surpigliar l'incarica, scriva l'agentura da novitads Reuters.

Cottarelli davant deschinas da cameras e microfons.
Legenda: Carlo Cottarelli declera suenter ses inscunter cun Sergio Mattarella dad acceptar l'incarica. Keystone

L’expert d’economia duai manar l’Italia or da la crisa. Il president da la republica Sergio Mattarella ha incumbensà il glindesdi l’anteriur directur dal Fond monetar internaziunal IWF Carlo Cottarelli da furmar ina regenza intermediara – e Cottarelli haja acceptà, rapporta l'agentura da novitads Reuters.

Elecziuns novas pli e pli probablas

Quella regenza pudess manar l’Italia en in’elecziun nova. Questa nova via ord la crisa da regenza ha sa cristallisada suenter che l’allianza tranter las partidas populisticas Cinque Stelle e Lega aveva fatg naufragi la dumengia saira.

Crap da stgarpitsch tranter Cinque Stelle e Lega era il criticher da l’Euro e la Germania Paolo Savona. Las duas partidas avevan pretendì, che Savona vegnia nov minister da finanzas. Il president da la republica Mattarella ha dentant refusà questa pretaisa e vilentà uschia las duas partidas.

Discordia tranter populists suenter «na» da Mattarella

Per ils populists da Cinque stelle e Lega raschun da renfatschar a Mattarella dad agir da maniera na democratica. Da las consequenzas da questa renfatscha n’èn las duas partidas dentant betg da medem avis: Fertant ch’il schef da Cinque Stelle Luigi di Maio vul relaschar a Mattarella, s’exprima il schef da la Lega Matteo Salvini cunter questa pretaisa.

Calmar ils martgads da finanzas cun Cottarelli

Tenor ils observaders speria Mattarella che Carlo Cottarelli, l’anteriur directur da l’IWF, possia calmar ils martgads da finanzas e restabilir la fiduzia en l’Italia.

Quai vegnia dentant a vegnir difficil, concluda l’agentura da novitads svizra SDA. Cinque Stelle e Lega hajan la maioritad en il parlament ed hajan gia annunzià da vulair votar cunter Cottarelli.

Las elecziuns novas, che fissan lura necessarias, pudessan vegnir fatgas il pli adura in settember o october.

RR novitads 14:00+