Nicolás Maduro haja obtegnì 68% da las vuschs, ha la presidenta da la cumissiun electorala annunzià. Al candidat da l'opposiziun, Henri Falcón, hajan percunter mo 21% dà la vusch. Il predicatur Javier Bertucci haja anc survegnì radund 10% da las vuschs.
Opposiziun pretenda novas elecziuns
Falcón aveva gia ordavant annunzià da betg renconuscher las elecziuns ed ha per consequenza pretendì novas elecziuns. I haja dà pliras irregularitads tar il process d’elecziun ed il president actual Maduro haja cumprà vuschs, ha argumentà il candidat da l'opposiziun.
Tenor la cumissiun electorala haja la participaziun a las elecziuns muntà a 46%. Curt avant era anc vegnì discurrì en tschertgels da la regenza d'ina participaziun da 32% e tenor l'opposiziun saja la participaziun stada sut 30%. Tar las elecziuns dal 2015 era la participaziun anc tar 80%.
Pli greva crisa da l'istorgia
Venezuela sa chatta actualmain en la pli gronda crisa da sia istorgia. Pervi da mancanza da devisas, po il pajas – cun las pli grondas ressursas d'ieli mineral – strusch pli importar mangiativas e medicaments. Il Fond monetar internaziunal (IWF) quinta per il proxim onn cun ina sminuziun da l'economia per 15% ed ina rata da l'inflaziun per dapli che 13'000%. Pervi da la crisa umanitara en la Venezuela, han gia milliuns da persunas bandunà il pajais.
RR novitads 06:00