Ils schuldads hajan empruvà da conquistar in deposit d’armas en ina caserna. Durant l'attatga sajan dus schuldads vegnids mazzads e set sajan vegnids arrestads. Plirs dals schuldads ch’hajan attatgà la caserna sajan anc sin la fugia – uschia il president vinavant. La revolta è capitada a Valencia, la terz gronda citad dal pajais, radund 170 kilometers en il vest da la chapitala Caracas.
Igl è vegnì sajettà
Al lieu da l'attatga sa chatta era ina brigada da tancs militars. Igl è vegnì dà alarm ed i saja vegnì sajettà. Manader da l'acziun saja stà Juan Caguaripano. El vegnia protegì dals Stadis Unids ed saja stà sco ultim a Miami, Panama ed en Columbia, ha ditg Maduro.
Scumond da bandunar l'agen pajais
Tar protestas a Venezuela èn gia mortas passa 120 persunas dapi l'avrigl. Dapi che Maduro ha installà ina radunanza constituenta cun 545 delegads per il pli socialistics è la situaziun anc ina giada vegnida mendra. La procuratura publica generala critica, Luisa Ortega è vegnida relaschada e na po betg bandunar il pajais.
Il parlament nua che l'opposiziun è cleramain pli ferma è ussa de facto senza pussanza damai che la nova radunanza constituenta è surordinada. Quella duai sa radunar almain per dus onns. Dasper ina nova Constituziun duai la radunanza era pigliar tuttas decisiuns politicas, relevantas. Blers pajais na renconuschan betg questa radunanza perquai ch'ella pudess esser il vehichel per bajegiar enturn il stadi en ina dictatura.
En medias socialas vegn speculà che l'attatga pudess chaschunar in cuntraculp massiv, sco suenter l'emprova da putsch en la Tirchia.
RR novitads 06:00