Siglir tar il cuntegn
Inhalt

Exteriur Madrid pretenda scleriment da Barcelona

La regenza catalana duaja far cler, sch'ella haja declerà sia independenza mardi saira u betg. Quai ha ditg il primminister Mariano Rajoy suenter ina sesida dal cabinet a Madrid. Tenor rapports da medias ha quella tschintg dis peda per ina resposta.

Il primminister da la Spagna, Mariano Rajoy, è sa scuntrà cun ils ministers da sia regenza per ponderar ils proxims pass en il conflict davart l'independenza da la Catalugna. Rajoy pretenda scleriment da la regenza catalana.

Gronda malsegirezza

Suenter il pled dal schef da la regenza da la Catalugna, Carles Puigdemont, è la malsegirezza en l'entira Spagna gronda. La situaziun resta tendida. Mesemna suentermezdi a las 16:00 vul la regenza infurmar la publicitad davart ils proxims pass.

Tenor rapports da medias pondereschia la regenza a Madrid tranter auter er d'applitgar l'artitgel 155. Quel prevesa che la regenza centrala pudess privar la regenza regiunala da la pussanza. Quai per cas che quella cuntrafà a la constituziun.

Mardi saira aveva il schef da la regenza regiunala da la Catalugna, Carles Puigdemont, sistì l'independenza ed appellà al dialog – quai er per deescalar l'entira situaziun.

Cornelia Vinzens amez la truscha a Barcelona

Persequità cun tensiun il pled da Puigdemont ha era Cornelia Vinzens mardi saira a Barcelona. Amez il martgà sin ina gronda paraid, quasi sco en in public viewing, ha ella guardà ensemen cun millis Catalans tge ch'il president catalan communitgescha. L’atmosfera saja stada fitg confusa suenter il pled. Nagin haja propi chapìco i giaja vinavant.

La glieud è stancla da quai vi e nà.
Autur: Cornelia Vinzensstudenta da fotografia a Barcelona

Sco quai che la studenta da fotografia di, è la pli blera glieud stancla da quai vi e nà. Las Catalanas ed ils Catalans veglian finalmain ina decisiun, tuttina sch’i èn per l’independenza u encunter.

RR novitads 11:00