Siglir tar il cuntegn
Inhalt

Exteriur Macron: «Nus essan vid perder la battaglia»

Al «One Planet Summit» ha il president franzos Emmanuel Macron avertì ch'il mund stoppia far anc dapli per il clima. Cun l'inscunter han passa 50 schefs da regenza e stadis dà in segn per il cumbat cunter la midada dal clima, e da betg sa laschar influenzar da la tenuta negativa da Donald Trump.

Purtret da Macron e Leuthard sin il teppi costschen.
Legenda: Emmanuel Macron e Doris Leuthard durant il «One Planet Summit» a Paris. Keystone

Dus onns suenter la cunvegna da clima da Paris ha il president franzos Emmanuel Macron envidà ad ina sentupada da successiun en la chapitala franzosa. El ha malegià in purtret stgir davart las stentas per la protecziun dal clima. Il mument sajan nus vid perder la battaglia, ha detg Macron avant plirs presidents e schefs da stadi sco era represchentants da l’economia mundiala.

Envidà a Paris ha Macro surtut per dar nov schlantsch a l'engaschi encunter la midada dal clima. L'entir moviment haja patì suenter ch’il president american Donald Trump ha gì annunzià ch’ils Stadis Unids aboleschan la cunvegna dal clima da Paris. Trump è perquai era betg stà preschent a la sentupada actuala.

Mesiras pli concretas che da l'ONU

Cun il «One Planet Summit» ha Macron vulì promover las mesiras concretas per realisar la cunvegna da clima da Paris. Auter che tar contractivas da l'ONU èn questa giada interpresas ed investiders stads en il center. Quels duain resguardar pli fitg la protecziun dal clima.

La presidenta da la Confederaziun, Doris Leuthard ha ludà l'engaschament a Paris. I saja positiv da metter ensemen politichers, scienziads ed interpresas. Cun quest aspect saja l'inscunter pli concret che las conferenzas da clima da l'ONU, ha ditg Leuthard a las medias. La Svizra s'engaschia activamain per l'economia da finanzas e veglia era dar enavant questa savida.

RR novitads 06:00