Siglir tar il cuntegn

Exteriur Maas: nagina concurrenza politica faira en la Russia

Il nov minister da l’exteriur tudestg Heiko Maas ha crititgà l'elecziun dal president en Russia.

Heiko Maas.
Legenda: Tiers quai che Heiko Maas critgescha las elecziuns vul en mantegnair il dialog cun la Russia. Keystone

Tenor il nov minister da l'exteriur tudestg, Heiko Maas, n'han las elecziuns en la Russia betg correspundì als standards europeics. D'ina concurrenza politica faira na possian ins franc betg discurrer en tut ils puncts, ha Maas commentà il glindesdi las elecziuns – durant l'inscunter dals ministers da l'exteriur da l'Uniun europeica. Er ch'ins haja pudì eleger sin la peninsla da la Crim che la Russia haja annectà illegalmain, n'è per Maas betg correct.

Tuttina veglia el mantegnair il dialog cun Wladimir Putin, che resta suenter las elecziuns vinavant en uffizi. «La Russia vegn a restar in partenari difficil. Ma tuttina è il dialog cun la Russia necessari per chattar ina schliaziun per ils gronds conflicts internaziunals.» Ins spetgia contribuziuns constructivas da la Russia. E quai dapli ch'en il davos temp.

Er l'OSZE crititgescha las elecziuns

Er l’organisaziun per la segirezza e la collavuraziun en l’Europa ha crititgà las elecziuns dal president en Russia. In’elecziun senza concurrenza na saja betg in’elecziun dretga. Blers candidats hajan gia avant las elecziuns ditg ch'els n'hajan nagina schanza.

Cler resultat, ma er correct?

Putin ha la dumengia cleramain gudagnà l'elecziun. Quai cun bunamain 77% da las vuschs. Observaturs da las elecziuns rapportan dentant da pli che 1'500 irregularitads.

RR novitads 11:00