Siglir tar il cuntegn
cuntegn

Exteriur Lumbardia e Venezia – Referendum per dapli autonomia

Dumengia voteschan las duas regiuns las pli ritgas da l'Italia – la Lumbardia e la Venezia – davart in referendum per dapli autonomia. Passa 11 milliuns votantas e votants da las regiuns en il nord da l'Italia èn clamads a l'urna.

In maun che metta in cedel da votaziun en in'urna.
Legenda: Referendum davart dapli autonomia en la Lumbardia e la Venezia. Keystone

Ils abitants da las regiuns Lumbardia e Venezia decidan oz davart in referendum per dapli autonomia. Las regenzas regiunalas accentueschan, ch'ellas veglian sulettamain dapli cumpetenzas per las regiuns e betg ina separaziun da l'Italia. Sco bun exempel servan ad els ils statuts d'autonomia dal Tirol dal Sid, dal Friaul e da la Sicilia.

Il motiv principal per il referendum èn las finanzas. Las regiuns pretendan ch'almain la mesadad da las entradas d'impostas restian en la regiun. Il resultat da la votaziun è però betg liant. La finamira da la partida federalistica Lega Nord che regia en las regiuns saja dad instradar suenter il referendum tractativas cun Roma. Pli auta che la participaziun saja e pli bler paisa che quai dettia per las tractativas, argumentescha la Lega Nord.

RR novitads 12:00