Siglir tar il cuntegn
cuntegn

Exteriur Lufthansa stritga pli che 800 sgols

Suenter ina pausa da chauma cumenza il mardi definitivamain la segunda unda da chauma dals pilots da la Lufthansa. La societad aviatica tudestga ha capitulà il glindesdi saira, e n’è betg pli ida avant dretgira per empruvar da franar la chauma.

Plirs aviuns da la Lufthansa sin in eroport
Legenda: Sco qua a Frankfurt resta la gronda part da la flotta da la Lufthansa a terra quests dis. Keystone

Il mardi stritga la Lufthansa 812 sgols a curta distanza che partan da la Germania, quai pertutga 82’000 viagiaturs. Supplementarmain 98’000 viagiaturs èn pertutgads la mesemna, cura che ulteriurs 890 sgols na han betg lieu. Lura scrodan era sgols a lunga distanza.

Sgols en Svizra

Sper las plazzas aviaticas da Turitg e Genevra, na sgolan il mardi era nagins aviuns da la Lufthansa a Basilea. Las societads affiliadas da la Lufthansa, tranter autras la Swiss, Eurowings e Germanwings, na sajan betg tangadas da la chauma, ha communitgà la Lufthansa.

In vegl conflict

Il sindicat ‘Associaziun cockpit’ pretenda per passa 5’000 pilots da la Lufthansa 3,7% dapli paja, la Lufthansa è pronta per in augment da 0,7%. Questa dispita dura dapi l’avrigl 2014. Vitiers vegnan differenzas pervi da pensiunaments e la strategia da la Lufthansa da bajegiar ora Eurowings, la societad affiliada che porscha sgols bunmartgads.

RR novitads 06:00