Siglir tar il cuntegn

Exteriur Londra vul segirar la collavuraziun suenter il Brexit

La primministra Britannica pretenda ina cunvegna da segirtad cun l'Uniun europeica suenter il Brexit. Gia il 2019 duai la cunvegna ir en vigur.

Theresa May.
Legenda: Er suenter il Brexit duai dar ina stretga collavuraziun tranter l'UE e Londra en il sectur da segirtad. Keystone

Ina cunvegnan cun l'Uniun europeica (UE) duai segirar la collavuraziun da la Gronda Britannia cun ils stadis da l'UE er suenter il Brexit.

Sco che la primministra da la Gronda Britannia ha ditg tar la conferenza da segirtad a Minca, saja ses pajais er suenter la sortida da l'Uniun europeica pronta da cooperar e furnir daners per tscherts programs da l'UE. Uschia saja il cumbat cunter il terrorissem ni era cunter cuntrabandists d’umans fitg impurtants e la segirtad da l’Europa saja era quella da la Gronda Britannia.

La segirtad da l'Europa è nossa segirtad.
Autur: Theresa MayPrimministra Britannica

Respectar la suveranitad

La cunvegna stoppian dentant respectar la suveranitad da la Gronda Britannia. Quai valia cunzunt per la dretgira europeica, che na saja en futur betg pli responsabla per la Gronda Britannia.

RR novitads 12.00