Siglir tar il cuntegn
Inhalt

Exteriur Londra: Incident cun in mort e plirs blessads avant moschea

A Londra ha in auto tschiffà pliras persunas avant ina moschea, quai conferma la polizia via twitter. Ella discurra d’in cas gravant. Sche quai era ina attatga sappientiva n'è anc betg cler.

Polizists avant la moschea.
Legenda: La polizia ha arrrestà il manischunz dal auto, in um da 48 onns. Keystone

In auto in uschènumnà mini-van è charrà en ina fulla da persunas avant ina moschea. In um saja mort e 10 persunas sajan vegnidas charradas cun blessuras en l'osptial, communitgescha la polizia da la citad. La polizia ha arrrestà il manischunz dal auto, in um da 48 onns. El saja medemamain vegnì ospitalisà ses stadi mental vegnia il mument intercurri. I na dettia nagins indizis sin ulteriuras persunas cumpigliadas. L'incident saja stà datiers d'ina moschea en il quartier da Finsbury Park. Il quartier da la citad Finsbury sa chatta al nord da Londra.

Motivs

Il motiv per quest cas n’è betg conuschents, sco l’emettur da televisiun Sky rapporta saja l’auto siglì en en persunas che sortivan da la moschea. Actualmain hajan spezialists d'anti-terror surpiglià las investigaziuns conferma la polizia. Ella discurra d’in cas gravant. Sche quai sa tracta d'in attentat n'è betg cler.

Trais attatgas en la Gronda Britannia

  • La davosa attatga a Londra è stada ils 3 da zercladur. Sin la London Bridge entamez la chapitala britannica, è in auto da furniziun charrà en ina fulla da glieud. Silsuenter èn ils attatgaders charrads paucs tschients meters fin al Borough Market. Là han ils trais umens attatgà persunas en ustarias. La finala ha la polizia mazzà ils trais attatgaders.
  • In attentader aveva mazzà ils 22 da matg 22 persunas e blessà fermamain 59 persunas. L'explosiun è stada ora avant la halla da concert dal concert da la chantadura da pop Ariana Grande a Manchester.
  • Ils 22 da mars è in um en in auto charrà sin la Westminster Bridge en ina fulla da persunas. En tut èn tschintg persunas mortas e pliras èn vegnidas blessadas.

RR novitads 06:00++