La dunna da 29 onns era vegnida mazzada la notg da gievgia sin venderdi tar cravals violents en la citad da Londonderry en l'Irlanda dal Nord. La polizia suppona che l'attatga è l'ovra d'ina gruppa militanta cun il num «Nova IRA». Ils dus suspectads vegnan il mument interrogads a Belfast.
Londonderry u Derry
Avrir la boxSerrar la box
Da la Gronda Britannia vegn la citad nordirlandaisa numnada uffizialmain Londonderry. Er la minoritad protestanta dovra questa versiun. Ils abitants ch'èn critics envers l'uniun da la Gronda Britannia e vulan ina separaziun da quella discurran da Derry (cunzunt catolics).
Protestas da Pastgas
Impuls per ils cravals sajan ils protests ch'han mintg'onn lieu durant Pastgas en connex cun il conflict da l'Irlanda dal Nord. L'Irlanda dal Nord ha patì decennis d'ina guerra burgaisa cun millis da morts. Cumbattì in l'auter han naziunalists catolics che vulan sa reunir cun l'Irlanda ed unionists protestants che vulan restar tar la Gronda Britannia.