Lindsay Hoyle è vegnì elegì ier saira sco nov «speaker». Il deputà da la partida socialdemocratica «Labor» ha survegnì 325 vuschs. En tut hai duvrà quatter scrutinis per eleger in nov deputà a la testa dal parlament. Lindsay Hoyle è avant stà vicepresident dal parlament britannic, il substitut da l'anteriur «speaker» John Bercow.
Hoyle ha ditg ch'el veglia quietar l'atmosfera en il parlament. Quai cunzunt durant las proximas debattas davart il Brexit. Quai sco cuntrast a ses antecessur John Bercow, ch'è stà enconuschent per ses stil plitost grop e direct.
Novas elecziuns
Gia damaun mesemna duess il parlament vegnì schlià. Quai en vista a novas elecziuns, che vegnan ad esser ils 12 da december. Il parlament ha l'emna passada decidì quai, sin proposta dal primminister Boris Johnson. Il parlament nov elegì sto lura confermar Lindsay Hoyle sco «speaker».
RR novitads 06:00
