Siglir tar il cuntegn

Header

Il chantadur Leonard Cohen sesa sin in canape
Legenda: Leonard Cohen, curt avant sia mort aveva el edì ses nov album. Igl è stà ses ultim. Keystone
cuntegn

Exteriur Leonard Cohen

Leonard Cohen, il chantadur e chantautur canadais è mort ils 7 da november 2016 en la vegliadetgna da 82 onns, quai ha confermà sia famiglia. Cun Cohen perdia il mund in artist legendar ed in visiunari zunt prezià e productiv steva scrit sin sia pagina da Facebook.

Be paucas emnas avant sia mort aveva Cohen publitgà ses davos album «You Want It Darker», in album melancholic che tracta era da la mort. En tut ha il musicist canadais publitgà 14 albums en sia carriera. Era tar RTR è Cohen adina puspè stà il tema en diversas emissiuns da musica (guarda er giudem).

So long Marianne

Naschì era Leonard Cohen il 1934 a Montreal en il Canada en ina famiglia gidieua. Gia sco uffant ha el emprendì da sunar la ghitara, la musica è dentant stà per llung temp sulet passatemp. Cohen ha vulì scriver, poesias e pli tard er romans. Ils onns 60 è el perquai emigrà per in temp sin l'insla greca Hydra. Là ha el emprendì d'enconuscher e charezzar Marianne. A sia musa ha el deditgà la chanzun «So long Marianne». Pli tard èn lur vias sa spartidas. Avant paucs mais han els anc ina giada gì contact. Curt avant la mort da Marianna Ihlen (ella aveva cancer), haja Cohen anc scrit ina brev ad ella, uschia scriva la gasetta «New Yorker». En questa brev fa Cohen allusiun ch'el suondia bainbaud ad ella. Paucs dis pli tard saja Marianna morta.

Vusch da fim e melanconia profunda

Las entradas dal scriver n'han betg tanschì per viver. Uschia è Cohen viagià e sa chasà er ils onns 60 a New York. Là ha el cumenzà a far musica, bainbaud cun grond success. Sia vusch da fim è quasi stà ses «label». Cun la chapiala naira sin chau ha el vitiers derasà in'aura da profunda melancolia.

Ses albums sco «Songs of Leonard Cohen» (1967), «Songs of Love and Hate»(1971) e «Death of a Ladies' Man» (1977) han er influenzà entiras generaziuns da musicists. Sco classichers valan sias chanzuns «Suzanne», «So long, Marianne», «First we take Manhatten (then we take Berlin)», «Halleluja» e «Chelsea Hotel #2».

RR novitads 06:00