Siglir tar il cuntegn

Header

cuntegn

Exteriur Lavina en Italia - ils gidanters na dattan betg si

Quatter dis suenter ch’ina lavina ha sepulì in hotel en l’Italia vegnan anc adina tschertgadas 23 persunas. Almain 5 persunas èn mortas tar la disgrazia. Or da la ruina dal bajetg èn vegnidas salvadas 11 persunas. 2 ulteriuras eran mitschadas da la lavina.

Dapi 24 uras n'hajan ils gidanters udì nagins segns da vita pli. La notg sin sonda avevan els pudì salvar quatter ulteriuras persunas ch'ins aveva localisà la saira avant. Sut la naiv sa chattan dentant almain anc 23 persunas. Enfin uss han las equipas da salvament chattà 5 baras.

Speranza da chattar ulteriurs survivents

Las equipas da salvament lavuran en turnus da 14 uras. La speranza da chattar ulteriurs survivents sa sminuescha pli e pli. Il grond problem sajan las cundiziuns da salvar perquai che la ruina pudess dar ensemen mintga mument.

La notg sin mesemna aveva ina lavina gigantica sepulì l’hotel da 4 stailas. La lavina era vegnida chaschunada da terratrembels. Las medias han rapportà ier d’almain 4 unfrendas. Las forzas da salvament han confermà duas unfrendas.

RR novitads 6:00+

Artitgels legids il pli savens