Siglir tar il cuntegn

Exteriur Las votaziuns tar il Brexit han cumenzà cun fullas a Londra

En la Gronda Britannia èn las urnas vegnidas avertas e la participaziun e las votaziuns è fitg gronda. A Londra èn pliras persunas idas ad uras a votar pervi da la tema ch'i na tanschia betg dal temp.

Il maletg mussa il bajetg nua che votantas e votants pon votar davart Brexit
Legenda: In biro da votar en il center da Londra, en la via che maina vers il palast da Buckingham. RTR/nc

L'interess per votar è stà fitg grond ed i pudess dar in record da participaziun. A Londra han bleras votantas e votants gì tema da vegnir memia tard per votar cunquai che trens e bus avevan retard pervia da la plievgia intensiva che ha inundà per part vias e tschalers.

Ina votaziun istorica

Las persunas che han votà en il center da Londra, en la via che maina al palast dal Buckingham, èn pertschartas da l'impurtanza da questa votaziun: Independent dal resultat na dettia nagina pussaivladad da turnar enavos. E tuttas e tuts spetgan plain tensiun il resultat.

Jau hai avunda da discussiuns, cifras, statisticas e speculaziuns. Uss quinta be pli il resultat!
Autur: Ina dunna che ha votà a Londra

Critica envers l'UE er da persunas che vulan restar

Sper las persunas ch'èn persvadidas per in IN u OUT, datti bleras persunas che han gì difficultats da decider en tge direcziun che la Gronda Britannia duai sa mover en l'avegnir.

Ed i dat bleras persunas che voteschan zuar per restar en l'Uniun Europeica - n'èn dentant insumma betg cuntentas cun Brüssel: Memia blera birocrazia, memia char, memia paucas controllas als cunfins e memia pauca autonomia per ils singuls stadis èn be insaquants chavazzins dals critichers. Els speran dentant che la Gronda Britannia restia commembra e possia uschia gidar a refurmar l'UE e sa participar a las midadas.

David Cameron sto ir a Brüssel e dir tge che la Gronda Britannia mida - betg dumandar per lubientscha, mabain far!
Autur: Ina dunna da Londra

RR novitads 20:00+