Siglir tar il cuntegn

Header

cuntegn

Exteriur Las partidas da dretga da l'Italia vulan reducir la taglia

En l'Italia èn las partidas da la dretga sa cunvegnidas ad ina strategia communabla per las elecziuns dals 4 da mars.

Stgars dus mais avant las elecziuns dal parlament en l'Italia èn las partidas da dretga Forza Italia, Lega Nord e Fratelli d'Italia sa cunvegnidas da vulair reducir las impostas e revocar ina refurma da renta. Plinavant vulan las partidas cumbatter per ina politica d'immigraziun pli severa. Tenor retschertgas pudess la coaliziun da la dretga gudagnar las elecziuns, però manchentar la maioritad absoluta.

Tariffa da taglia pauschala

Ils schefs da las partidas da dretga han concludì ina tariffa da taglia pauschala. Ina tariffa concreta han els dentant betg numnà. La Lega Nord ha proponì d'introducir ina taglia pauschala da 15%. Berlusconi da la Forza Italia ha discurrì da 20 fin 25%. Il mument pajan ils Talians ina tariffa da taglia da tranter 23 e 43%.

Betg auzar la vegliadetgna da pensiun

La refurma da renta 2011 prevesa che la vegliadetgna da pensiun vegn auzada en divers pass. Ina gronda part da la populaziun e surtut da la Lega Nord crititgeschan fermamain questa lescha. L'Italia dat ora pli che 16% da sia prestaziun economica per rentas. Quai è il pli aut cumpart en Europa suenter quella da la Grezia.

RR novitads 06:00

Artitgels legids il pli savens