Siglir tar il cuntegn
Inhalt

Exteriur Las fatschentas cun armas creschan globalmain

Las expensas per il militar sin l’entir mund èn creschidas il 2015 per 1%. Quai per l’emprima giada dapi quatter onns. En tut han ils stadis investì bunamain 1,7 billiuns dollars per il diever militar. A la testa restan ils Stadis Unids da l’America.

Ina exposiziun da tancs militars.
Legenda: Globalmain han ils stadis investì 1% dapli per il diever militar. Reuters

L’onn 2015 èn las expensas globalas per il militar creschidas sin 1,676 billiuns dollars in augment da 1%. Quai communitgescha l’institut da perscrutaziun da pasch Sipri a Stockholm. Ils ultims onns eran las expensas globalas per il militar mintgamai sa sminuidas lev.

Ils experts da Stockholm han registrà differenzas tranter ils pajais. Il pli marcant èn ils budgets militars creschids tar ils stadis en l’Europa dal ost ed el Proxim orient. Là sa chattan il mument era ils conflicts militars, sco la guerra civila en Siria, ni il conflict en l’Ucraina dal ost.

Stadis Unids anc avant la China

Las expensas tar ils stadis en l’America dal nord ed el l’Europa dal vest èn dentant er il 2015 sa sminuidas. Ma tuttina han ils Stadis Unids investì en vista globala ils blers daners per il militar. Tenor ils experts dal Sipri han ils Stadis Unids investì radund 596 milliardas dollars per il militar. Quai per 2,4% pli pauc che l’onn passà, ma tuttina en vista globala èn quai 36% da tut las expensas militaras. Sin plazza dus suonda la China cun investiziun da radund 215 milliardas dollars, in plus da 7,4% en cumparegliaziun cun l’onn avant. Suandà da l’Arabia Saudita cun 87,1 milliardas dollars (plus 5,7%) e la Russia cun investiziuns da 66,4 milliardas dollars (plus 7,5%).

Dapli armas per il cumbat cunter il terror

In pussaivel trend, tar dapli investiziun militaras, vesan ils experts dal Sipri tar il cumbat cunter il terror. Uschia pon las expensas tar ils stadis en l’America dal nord ed en l’Europa dal vest puspè crescher ils onns proxims. La Germania, la Gronda Britannia e la Frantscha han gia annunzià da vulair auzar las investiziuns militaras per cumbatter il terror.

RR novitads 06:00