Siglir tar il cuntegn
cuntegn

Exteriur Labour perda vuschs

Tenor l'emprim trend da votaziuns en la Gronda Britannia perda la partida Labour numerus mandats tar las elecziuns regiunalas e communalas.

Il schef da la partida Labour, Jeremy Corbyn sa preschenta als fotografs cun ina gruppa d'aderents
Legenda: Il schef da la partida Labour, Jeremy Corbyn sa preschenta als fotografs. Keystone

Suenter che passa la mesadad da las vuschs èn dumbradas or tar las elecziuns communalas en l'Engalterra ha la partida bain pers numerus mandats.

Las perditas na sajan dentant probabel betg uschè grondas sco spetgà. Schizunt en il sid dal pajais ch'è influenzà dals conservativs ha la partida tenor las emprimas dumbraziuns pudì defender intgins da ses centers. Cun resultats per l'elecziun dal burgamester da Londra èsi pir da quintar questa saira.

Liberals da sanestra gudognan en Scozia

En la Scozia ha la partida liberala da la sanestra SNP gudagnà ils pli blers mandats, dentant pers la maioritad absoluta. En total ha la SNP 63 da 129 sezs. La partida Labour ha 24 mandats en la Scozia. En il Wales ha la partida UKIP da l'adversari da l'UE Nigel Farrage per l'emprima giada gudagnà mandats en il parlament regiunal. Malgrà perditas resta la partida Labour la pli ferma en il Wales.

RR novitads 07:00 / 12:00