Siglir tar il cuntegn

Exteriur La Tirchia repatriescha mintgadi var 100 fugitivs sirians

L'organisaziun per dretgs umans Amnesty International fa reproschas a las autoritads tircas ch’ellas hajan tramess enavos plirs millis fugitivs sirianas en Siria.

La bandiera da la Tirchia en in champ da fugitivs.
Legenda: La Tirchia trametta mintgadi enavos en Siria blers fugitivs. Keystone

Las ultimas emnas haja la Tirchia bunamain mintgadi repatrià fugitivs sirians enavos en lur patria. Enfin a 100 fugitivs per di sajan vegnids tramess enavos en Siria, scriva Amnesty International. Quai cuntrafetschia betg mo al dretg europeic mabain era al dretg tirc, accentuescha Amnesty International, l’organisaziun per ils dretgs umans.

Cunvegn tranter UE e Tirchia va proximamain en vigur

La Tirchia ha pir da curt suttascrit ina cunvegn cun l’Uniun europeica co schliar la crisa da fugitivs. Uschia èsi previs che la Tirchia surpiglia tut ils fugitivs illegals da la Grezia. Alura duajan ils stadis da l’UE per mintga fugitiv surpiglià reprender direct in fugitiv sirian da la Tirchia. La cunvegna duai ir en vigur a partir da l’emna proxima.

RR novitads 06:00