Siglir tar il cuntegn
Inhalt

Exteriur La Russia ha elegì – Putin è il vegl ed il nov president

La Russia ha elegì ses president: Las agenturas rapportan dad enquistas ch'attribueschan a Wladimir Putin dad avair fatg 73,9% da las vuschs en l'elecziun. Durant la dumengia d'elecziun haja dà ina seria dad irregularitads, rapportan observaders ed agenturas.

El vegn or dal cumpartiment da vuschar.
Legenda: Il president ha elet il president – Wladimir Putin ha elegì la dumengia a bun'ura a Moskau. Keystone

Curt e concis

  • Il president nov vegn a restar il vegl: La victoria da Wladimir Putin è pli che segira.
  • In'emprima enquista suenter l'elecziun, in exit-poll, attribuescha 73,9% da las vuschs a Putin.
  • Il quint dal Kreml, che vul che 70% dals 109 milliuns votants russ sa participeschian a las elecziuns, para dad ir si.
  • La dumengia d'elecziun è er vegnì rapportà da manipulaziuns russas ed attatgas da cyber da l'exteriur.
  • Emprims resultads vegnan spetgads a partir da la saira las 19:00.

Fertant che la Russia elegia rapportan vers il suentermezdi observaders da las elecziuns da cumprovas da manipulaziuns.

Manipulaziuns da betg pudì vuschar fin a vuschar pliras giadas

Aderents dal politicher d’opposiziun Alexej Nawalny han rapportà, ch’els n’hajan betg pudì entrar en locals d’elecziun. Auters rapportan da cas nua ch’i saja vegnì vuschà pliras giadas. En videos, che curseschan en la rait, èn da vesair biros d’elecziuns nua che pachets entirs da cedels d’eleger èn vegnids stuppads en las urnas.

Tenor indicaziuns russas sajan 1’300 observaders da l’exteriur activs tar l’elecziun. Uschia haja l’ Organisaziun per la segirezza e la collavuraziun en l’Europa OSCE tramess 600 observaders en Russia. Ella vegn a dar enconuschent sias observaziuns il glindesdi.

Attatgas da cyber en differents lieus

La rait da computers da la cumissiun d'elecziun russa haja stuì sa defender al di d'elecziun cunter attatgas da cyber or dad almain 15 pajais. Ils servers sajan vegnids inundads da dumondas da massa (DDoS) per metter els plat, ha fat a savair la scheffa da la cumissiun d'elecziun, Ella Pamfilowa, gia l'avantmezdi a Moskau.

Sper la pagina da la cumissiun sajan er pertutgadas medias russas, scrivan las agenturas. Las attatgas derivian dad almain 15 pajais, vegn er citada l'agentura da novitads Tass, ch'è fidela al Kreml.

Il vegl vegn ad esser il nov – nagin ha schanzas sper Putin

En Russia èn averts ils locals per in'elecziun, ch'era decisa gia avant ch'ella aveva cumenzà. Wladimir Putin vul vegnir reelegì – e perquai èsi exclus, ch'ils ulteriurs sis candidats u la candidata vegnan ad avair ina schanza. Uschia vegn la pussanza en la sedia da la regenza russa, il Kreml, restar almain per sis ulteriurs onns tar Putin.

Participaziun ad elecziun vegn valitada sco impurtant indicatur

L'unic che n'è anc betg cler è quant auta che la participaziun a l'elecziun vegn ad esser. Ella vegn valitada da tut las varts sco impurtant indicatur per l'atmosfera en il pajais – e perquai èn tuts clamads a las urnas.

Uschia fa er la Sbornaja, l'equippa naziunala da la Russia, reclama per ir a vuschar.

«Nus vegnin a votar!» scriva la squadra da ballape russa:

La finamira dal Kreml è gia enconuschenta da ditg: El vul cuntanscher ina participaziun da 70%. Tar l'ultima elecziun aveva Putin savì persvader a 64,4% da quels 65,3% dals Russ ch'eran ids ad eleger.

Putin ha dà giu sia vusch a Moskau

Il president da la Russia sez ha votà la bun'ura a Moskau. Tenor l'agentura Interfax haja el ditg dad esser persvadì dal program ch'el propona al pajais. El n'haja naginas pretaisas envers l'autezza da sia victoria. Putin saja cuntent cun mintga cifra da pertschients «che permetta dad accumplir las lezias dal president».

Il president Russ elegia – e communitgescha quai sin Twitter:

La Russia elegia dapi la sonda notg

Independentamain da quest votum dal president para il quint dal Kreml dad ir si: L'Ost lontan dal pajais e la Sibiria han gia elegì. Da là annunzian tut las autoritads regiunalas che la participaziun saja pli auta che tar l'ultima elecziun.

Actualmain elegian ils Russ en il vest dal pajais, nua che la gronda part dals Russ abitan. En Russia dastgan eleger 109 milliuns. Ils emprims resultads vegnan spetgads la dumengia saira las 19:00 da l'exclava Kaliningrad en la mar da l'Ost.

RR novitads 10:00++