«La retorica da Kim Jong-Un è da giudair cun precauziun»

Kim Jong-Un ha smanatschà la mesemna concretamain d'attatgar la insla Guam. Quai è in'insla en il Pacific dal vest e medemamain basa militara dals Stadis Unids. Esi da temair che quests disputs escaleschan insacura?

Kim Jong-Un e Donald Trump.

Legenda da maletgs: Retorica da guerra tranter la Corea dal Nord ed ils Stadis Unids. Reuters

I haja dà naginas midadas essenzialas en la relaziun tranter las duas terras, declera James W. Davis, professer per relaziuns internaziunalas da l'universitad da Son Gagl. «Nus savain dapi blers onns che la Corea dal Nord sviluppescha armas atomaras. Uss èsi simplamain daventà cler ch'i èn forsa in zic pli enavant che quai ch'ins ha sminà fin uss. Vid la situaziun strategica n'è dentant sa mida nagut», uschia Davis.

La provocaziun na prenda nagina fin

Il reschim a Pjöngjang ha concretisà ils plans per in’attatga sin l’insla da Guam en il Pacific. Fin mez avust duaja dar in plan concret da sajettar quatter rachetas a mesa distanza sin l’insla che tutga als Stadis Unids. L’ultim pled en chaussa haja lura il schef da stadi Kim Jong-Un. Quai rapportan las medias statalas nordcoreanas.

Il minister da defensiun american, James Mattis ha avertì la Corea dal Nord dad acziuns ch'avessan per consequenza ch'il reschim ed il pievel en la Corea dal Nord vegnissan eliminads.

Perquai ch’il conflict sin la peninsla coreana escalescha pli e pli, vegn il cussegl da segirezza naziunal da la Corea dal Sid ensemen la gievgia.

Dictaturs n'ageschan betg adina raziunal

Sch'ins stoppia uss propi prender serius las smanatschas da Kim Jong-Un e Donald Trump saja grev da dir. El saja precaut cun valitar quai ch'in dictatur dia. Fatg saja dentant che Kim Jong-Un na sappia betg cuntanscher insatge cun in'attatga. El sappia che quai na muntass betg mo la fin da sia regenza mabain er da sia tiara. «Ils Americans reagissan massiv. Uschia è la retorica da Kim Jong-Un da giudair cun precauziun.» Era per l' America na fiss ina guerra betg d'avantatg. Sche las duas partidas restian raziunalas, na stoppian ins betg far quitads. «In dictatur n'agescha dentant betg adina uschè logic e raziunal sco quai che nus giavischassan», concluda James W. Davis.

Bursas han reagì sin il conflict

Las obligaziuns da la confederaziun che valan sco segiras èn stadas dumandadas mesemna Er il franc è stà tschertgà, quai che ha gulivà ina part da quai ch'il franc ha pers l'ultim temp visavi l'euro.

Ils titels da las aczias han dentant pers a la bursa. L'SMI ha nudà 1,6% pli bass che mardi. Remartgas dal president american Trump han fatg vegnir malsegirs ils investiders. El ha smanatschà a la Corea dal Nord cun ina reacziun, sco quai ch’il mund n'haja anc maina vesì, en cas dad ulteriuras provocaziuns.

Minister da defensiun James Mattis avertescha

Il minister da defensiun american, James Mattis ha avertì la Corea dal Nord d'acziuns ch'avessan per consequenza ch'il reschim ed il pievel en la Corea dal Nord vegnissan eliminads.

Il pajais stoppia terminar sia isolaziun e sistir il program atomar. La Corea dal Nord vegniss a perder mintga conflict ch'ella entschaivia. Il ministeri da l'exteriur american emprovia tut per schliar las smanatschas da la Corea dal Nord cun meds diplomatics.

RR actualitad 17:00