Exact 51.89% da la populaziun da la Gronda Britannia ha votà per il Brexit avant exact in onn. Suenter l'emprim schoc regia gronda malsegirtad en il pajais.
«Sa midà è plitost pauc – la vita va vinavant»
Cler haja il Brexit dà bler da discutar – mo actualmain fatschentian plitost ils acts da terror e l'incendi dal sgrattatschiel la glieud. Quai di l'engiadinaisa Anna Lee-Famos che viva dapi l'onn 1961 a Londra.
Blers che hajan votà per il Brexit avant in onn na sajan betg stads infurmads bain, hajan sa laschà manar d'emoziuns. Ozendi audia ella da persunas che s'enriclian d'avair votà per sortir da l'Uniun Europeica, di la docenta d'art pensiunada.
Gia avant in onn aveva Anna Lee-Famos accentuà che la votaziun dal Brexit saja ina decisiun dal cor u dal chau.
Chaos politic en Gronda Britannia
Era in onn suenter la votaziun da Brexit, na saja anc insumma betg cler, tge che la Gronda Britannia veglia propi. Quai di Stefanie Walter, profesra per relaziuns internaziunalas a l'universitad da Turitg. Per l'ina regia in chaos politic, cunquai che la primministra Theresa May haja pers sustegn e simpatia. Per l'autra perquai che votantas e votants hajan vulì sortir da l'UE ord ils pli differents motivs ed uss saja grev d'unir tut quels interess.
Economicamain na sentia la Gronda Britannia anc betg grondas consequenzas. Quai fa surstar la politologa. Surtut ils consuments hajan stabilisà l'economia.
Actualmain dettia dentant indizis ch'il Brexit pudess avair influenza sin l'economia.
«Cun l'UE vai bler meglier ch'avant in onn»
Avant bun in onn aveva la politologa Stefanie Walter ditg ad RTR, che l'Uniun Europeica sa chattia en sia pli greva fasa dapi la fundaziun. Ussa saja quai dentant sa midà, accentuescha la politologa. L'emprim trend saja sa mussà l'atun 2016 cura che Alexander Van der Bellen saja vegnì president da l'Austria e dacurt cun l'elecziun dad Emmanuel Macron sco president franzos.
Dentant gist era il Brexit haja unì l'Europa. Blers hajan cumenzà a stimar las valurs europeicas pir enten vesair tge ch'els perdissan cun bandunar l'UE.
Era pervia da Donald Trump sto l'Europa star ensemen.
Donald Trump saja incalculabel sco president e l'Europa na possia betg pli sa fidar ch'ils Stadis Unids regleschian tut sin il mund.
RR actualitad 07.00ff