Siglir tar il cuntegn

Header

cuntegn

Exteriur La maioritad vuless in Brexit-Brexit

Il 2016 eran 52% dals Brits sa decidids da bandunar l'UE. Ussa na vul la maioritad tenor il studi tuttina betg il Brexit.

L'institut demoscopic BMG ha dumandà 1400 persunas tranter ils 5 ed ils 8 da december, sch'els veglian restar en l'Uniun europeica, u betg. Cun 51% han ils aderents da l'UE il nas davant. Be 41% dals Brits vulan sortir da L'UE. In pertschient n'ha betg respundì la dumonda ed ils ulteriurs set pertschient han ditg «sai betg».

Il 2016 veseva quai anc or auter: 52% dals Brits avevan votà per il Brexit, e damai per bandunar l'Uniun europeica.

Responsabels èn ils anteriurs abstenziunists

Responsabels per la midada èn cunzunt quels che n'avevan betg votà il 2016. Quatter da tschintg anteriurs abstenziunists dessan uss lur vusch per restar en l'EU. La gronda part dals anteriurs aderents dal Brexit restan dentant fidaivels a lur decisiun: Mo 10% da tals han midà l'opiniun – e restassan uss en l'EU.

L'enquista ha dentant gì lieu avant che la primministra Theresa May ha instradà la segunda fasa da negoziaziun davart il Brexit.

May discurra da progress

En ina intervista cun la gasetta «Sunday Telegraph» è la primministra s'exprimida encunter ils critichers: Cun la segunda fasa da negoziaziun haja ella cumprovà ch'ils critichers hajan tort. «Nus faschain progress sin la via da sortir da L'EU.» Quai mussian era las novas cunvegnas aifer las tractativas d'extrar da l'UE.

RR novitads 06:00

Artitgels legids il pli savens