Exteriur - La Germania fa urden suenter ils G20 - Novitads

Il president tudestg Frank-Walter Steinmeier è sa mussà schoccà dals cravals grevs a Hamburg durant l’inscunter dals G20. Quai ch’el haja vesì haja «scurlattà» el e fetschia el «consternà», ha ditg Steinmeier tar in visita a Hamburg.

Steinmeier: Reconuschientscha ed engraziament a la polizia

Demonstraziuns talmain violentas n’haja la Germania betg gì ils onns passats. Intgins hajan sa cumportà «senza resguard e cun ina furia destructiva senza cunfins». Steinmeier ha engrazià explicitamain als policists per lur lavur. Els na meritassian betg be reconuschientscha ma er engraziament. Els hajan prestà lur servetsch per la segirezza e protegì il dretg da sa radunar.

476 policists blessads, 186 arrestads e 225 en fermanza

Quai èn las cifras or da la bilantscha ord vista da las autoritads, communitgadas la dumengia dal manader da l’acziun Hartmut Dudde. Da las persunas arrestadas sajan 132 da la Germania, 8 da la Frantscha e 7 da l’Italia, scriva l’agentura da novitads Reuters.

Critica, ch’ella haja reagì massa tard sin ils cravals en il Schanzenquartier, renviescha la polizia: Pervi da la gronda violenza duvrada cunter ils policists hajan stuì vegnir mobilisadas unitads spezialas cunter ils extremists.

Scholz: Finamira dad in inscunter segir ha fatg naufragi

Il president da la citad da Hamburg, fin uss adina suveran suveran, haja fatg bilantscha cun fatscha sblacha, rapportan las agenturas da novitads. Suenter ils gronds excess da violenza ha Olaf Scholz concedì d'avair fatg naufragi cun sia finamira d'in inscunter dals G20 ch’è segir per la politica e per la populaziun.

Ins haja mess a disposiziun a la polizia tut quai ch'ella haja dumandà. Ch'i haja tuttina dà violenza massiva saja irritond. Critica envers la polizia ha Scholz dentant renvià. El na possia betg chapir sche la lavur vairamain eroica da la polizia vegnia crititgada uss u ils proxims dis.