Siglir tar il cuntegn

Exteriur La Germania fa puspè controllas al cunfin

La regenza tudestga reagescha sin l’unda da fugitivs dals ultims dis. Suenter che passa 15’000 fugitivs èn arrivads a Minca mo questa fin d’emna, ha la Germania decidì da puspè far controllas als cunfins. Quai valia dentant mo per in tschert temp e mo al cunfin cun l’Austria.

Al cunfin tranter la Germania e l’Austria hai dà colonnas pervia da las controllas.
Legenda: Al cunfin tranter la Germania e l’Austria hai dà colonnas pervia da las controllas. Keystone

La Germania fa puspè controllas al cunfin cun l’Austria. Quai suenter che millis da fugitivs èn arrivads ils ultims dis en la Germania. La finamira saja da «franar l’unda da fugitivs vers la Germania» e da vegnir uschia puspè tar in proceder reglà, ha ditg il minister da l’intern Thomas de Maizière.

Era raschuns da segirezza hajan manà a questa decisiun, uschia Maizière a Berlin. Tenor il dretg europeic vertent na saja la Germania betg responsabla per la gronda part da quels che tschertgian protecziun.

Dublin vala anc adina

Las reglas da la cunvegna da Dublin valian dentant anc adina, uschia il minister da l’intern tudestg. El ha fatg l’appel a tut ils pajais commembers da l’UE, da sa tegnair puspè vi da quella cunvegna: pia da betg mo registrar il fugitivs cura ch’els vegnan en il pajais, mabain era d’avrir ina procedura d’asil per quels.

La prontadad da gidar na dastgia betg vegnir surstrapatschada. Quest pass da far puspè controllas als cunfins, saja in signal a l’Europa. La Germania surpiglia sia responsabladad umanitara, ha il minister accentuà. La chargia stoppia dentant vegnir repartida solidaricamain. Tut ils problems na vegnian ins betg a pudair schliar cun puspè far controllas als cunfins.

Nagins trens tranter Austria e Germania

Curt avant il pled dal minister, han las Viafiers federalas da l’Austria (ÖBB) communitgà che la colliaziun da tren da l'Austria cun la Germania saja sistida a partir dad immediat. La mesira saja vegnida tratga sin giavisch da la «Deutsche Bahn». Era la Viafier da la Germania ha annunzià d'avair sistì il traffic da tren cun l'Austria per 12 uras fin damaun a bun'ura da las 6.

RR novitads 20:00