Per vegnir ensemen cun questas 54 milliardas vul Trump spargnar en tut tschels ministeris en tut precis questa summa. Trump emprova uschia da mussar in purtret optimistic, plain segirezza. Accumpagnà da dumbers da retschertgas istoricamain schlets preschenta Trump al congress las pitgas per sia politica.
«Nus stuain gudagnar guerras»
En temps malsegirs saja ses budget in da la segirezza naziunala e publica. Trump agiunta anc: "Nus stuain puspè gudagnar guerras."
Las planisaziuns dal budget dal president dals Stadis Unids èn l'emprim pass en negoziaziuns tranter la Chasa alva e las singulas autoritads federalas. Damai che quest process e uschiglio uschè cumplitgà e lung, n'è quai normalmain nagina gronda chaussa. Quest onn è quai auter. Il congress porta midadas e sto approvar il budget.
Spargnar tar l'ambient e programs socials
Tenor la "New York Times" mussia la proposta da budget ch'i vegnia lura spargnà tranter auter tar l'Uffizi d'ambient EPA. Trump aveva gia annunzià quai durant ses cumbat electoral. Er daners per programs d'agid social duain vegnir scursanids, cun excepziun da Social Security e l'assicuranza Medicare per seniors.
Trump vul persvader ses aderents ch'el mettia enturn spert sia agenda dal cumbat electoral. Sper la segirezza naziunala duain era la taglia, plazzas da lavur, commerzi, immigraziun e sanadad esser puncts impurtants.
RR novitads 18:00