La Corea dal Nord provotgescha cun ina racheta sur il Giapun

La Corea dal Nord ha fatg in ulteriur test da racheta. Quella saja sgulada sur il nord dal Giapun. Quai ha communitgà la regenza dal Giapun.

Portraits da Kim Jong Un vegnan ars.

Legenda da maletgs: Kim Jong Un para dad incendiar vinavant – il maletg è dad ina demonstraziun dal favrer 2016 a Seoul cunter il dictatur vischin. Keystone

La regenza giapunaisas valitescha quest ulteriur test sco smanatscha seriusa e gravanta. Perquai pretenda il primminister Shinzo Abe ina sesida d’urgenza dal Cussegl da segirezza da l’ONU a New York. Il ministeri da l’extern da la China admonescha, ch’il conflict cun il Giapun haja cuntanschi in «punct critic».

Racheta sgola sur il Giappun vi en la mar

La racheta ballistica saja partida datiers da la chapitala nordcoreana Pjöngjang e sgulada radund 2’700 kilometers avant ch'ella saja crudada en il Pacific, ha infurmà il stab general da la Corea dal Sid. Tenor la Corea dal Sid inditgeschia il test, che la Corea dal Nord na sa vul betg laschar tementar dal squitsch creschent davart ils Stadis Unids.

President Trump para dad esser sa trumpà

Las sancziuns pli diras da l’ONU na paran betg da franar il gust da lantschar rachetas da la Corea dal Nord. Tenor observaders sa drizzia il pli nov test en emprima lingia cunter ils Stadis Unids. Anc avant intgins dis era il president Trump sa mussà cuntent dal fatg, ch’il dictatur nordcorean Kim Jong Un cumenzia «dad ans mussar respect».

RR novitads 06:00