Siglir tar il cuntegn
Inhalt

Exteriur La Corea dal Nord metta vinavant strom en il fieu

Suenter in ulteriur test da racheta da la Corea dal nord s'accentueschan las tensiuns sin la peninsla coreana. Il schef da stadi nordcorean Kim Jong-Un laschia lavurar cun plaina forza vi dad armas intercontinentalas, rapporteschan las agenturas da novitads internaziunalas.

Kim Jong-Un l’avrigl en la naiv en visita tar sia schuldada.
Legenda: Kim Jong-Un l’avrigl 2015 en visita tar sia schuldada. Keystone

La Corea dal Sid ha confermà en la notg sin mardi in exercizi communabel cun ils Stadis Unids.

Object da stgandel actual è in aviun

En quel exercizi saja vegnì duvrà in in aviun da bumba a lunga distanza dal tip B-1B. Quai è in aviun suprasonic che sa transportar anc dapli bumbas ch’il aviun da bumba B-52. Sin quai han medias nordcoreanas rapportà, ch'ils Stadis Unids treneschian da bittar giu armas atomaras sin il pajais communistic.

Ils Stadis Unids han respundì, che lur aviuns B-1B sajan vegnids fabritgads enturn per attatgas convenziunalas e na possian betg bittar giu armas atomaras.

Reschim da Kim Jong-Un tutgia «sin set meters precis»

L'agentura da novitads nordcoreana ha entant rapportà ch'il schef da stadi Kim Jong Un haja instradà cun success in test per in «nov tip da racheta ballistica guidada cun precisiun». Cura ch’il test vegn ad esser n’è betg vegni dat enconuschent.

Entant ha communitgà la Corea dal Nord, che la racheta ballistica testada ier mardi haja tutgada sia destinaziun sin set meters. Sche quellas indicaziuns turnan na sa betg vegnir verifitgà entras funtaunas independentas.

Publicamain enconuschent è, che las rachetas ballisticas las pli precisas ch’èn en acziun en il mund ulteriur tutgian sin 200 meters precis.

La Corea dal Nord provotgescha

Ier mardi aveva la Corea dal Nord ignorà cun in ulteriur test da rachetas pliras resoluziuns da l’ONU che la scumondan tests cun rachetas ballisticas.

La situaziun en la regiun è dapi dus tests atomars e divers tests da rachetas dal reschim da la Corea dal Nord fitg tendida. La Corea dal Nord lavura a tut pretsch vi da rachetas che na san betg mo tutgar il Giapun e la Corea dal Sid, ma er ils Stadis Unids.

RR novitads 06:00