Siglir tar il cuntegn
Inhalt

Exteriur La Belair po puspè sgular

La societad aviatica svizra Belair è salvada dal concurs. La firma d'investment tudestga SBC la cumpra ord l'insolvenza ed ils collavuraturs pon turnar.

sgol air berlin
Legenda: Fin qua tutgava la Belair tar la societad aviatica Air Berlin ch'è en insolvenza dapi l'october passà. Keystone

Uss pon ils anteriurs radund 200 collavuraturs puspè s'annunziar tar la societad aviatica Belair. Quels aveva la Belair relaschà en il decurs da l'insolvenza da la Air Berlin da l'october passà. Fin qua tutgava la Belair a la Air Berlin. Davart il pretsch da la transacziun n'ha la nova possessura – la gruppa d'investment SBC da Düsseldorf – vulì tradir nagut.

Sgular uschè spert sco pussaivel

Sut tge marca, e da tge temp che la nova societad vegn puspè activa, na saja anc betg fixà, communitgescha la SBC. Ins saja en discurs cun clients da l'Europa. Finamira saja da puspè sgular la stad 2018. Qua stoppian però las autoritads svizras anc dar las lubientschas.

Sgols da charter en la regiun mediterranas

La Belair ha gì fatg il 2016 entaifer la gruppa da l'Air Berlin ina svieuta da radund 90 milliuns francs. Ella era oravantut preschenta enturn la Mar Mediterrana e l'Africa dal Nord cun sgols da charter.
RR novitads 06:00