Siglir tar il cuntegn

Header

Navigaziun

cuntegn

Exteriur L'orcan «Patricia» ha pers in zic intensitad

L’orcan Patricia ha pers in zic intensitad cura ch’el ha cuntanschì la costa dal Mexico. Sco il servetsch meteorologic dals Stadis Unids ha communitgà, saja il stemprà uss vegnì taxà sin stgalim 1 e betg pli sin stgalim 5.

L'orcan saja dentant anc adina fitg privlus, han ditg ils meteorologs responsabels. Ils vents buffan enfin a 190 kilometers l'ura, sur la mar buffavan els anc cun spertadads da sur 300 kilometers l'ura. Il stemprà «Patricia» aveva cuntanschì la costa dal Mexico cun ferms vents, blera plievgia ed autas undas d’enfin a 4 meters.

Ils donns paran actualmain d'esser pli pitschens che spetgà, scrivan las agenturas da novitads. L'orcan haja sragischà plantas ed il vent haja tschiffà autos.

Pliras persunas han stuì vegnir evacuadas

Ils servetschs da catastrofas averteschan da bovas e auas grondas. Pliras persunas han stuì vegnir evacuadas e millis persunas en fugidas en l’intern dal Mexico. En il lieu turistic Puerto Vallarta èn radund 15’000 turists vegni evacuads, ha declera il responsabel dal servetsch da catastrofas mexican. Schuldada mexicana è vegnida tramessa en ils lieus da privel.

Obama ha annunzià agid

Via il servetsch da novitads curtas «Twitter» ha il president american Barack Obama annunzià agid umanitar.

Il stemprà èra vegni taxa sin il pli aut stgalim 5, in tal stemprà po auzar autos e umans en l’aria, ha declerà il responsabel dal servetsch meteorologic. Ils vents miserads sur la mar eran ils pli svelts insumma mesirads sin la vart nord dal globus.

RR novitads 06:00