Siglir tar il cuntegn

Exteriur L'Italia ha finalmain ina nova regenza

La regenza taliana po cumenzar a lavurar. Suenter il senat, ha er la chombra da deputads acceptà la nova regenza sut Giuseppe Conte. La nova regenza taliana vul sbassar la taglia ed il medem mument augmentar las expensas socialas. Quai pudess provocar dispitas cun l'UE.

Primminister Giuseppe Conte.
Legenda: Primminister Giuseppe Conte tar ses pled en la chombra dals deputads. Keystone

350 deputads han vuschà il mardi a Roma per l'allianza populistica dal moviment «Tschinque Stelle» e la Lega, 236 han vuschà cunter e 35 èn s'abstegnids. Il senat aveva gia dà il mardi ses consentiment. Dapi las elecziuns ils 4 da mars èn las duas partidas stadas en discurs per furmar ina coaliziun. In'emprima emprova aveva fatg naufragi.

La regenza da Conte vul sbassar la taglia ed il medem mument augmentar las expensas socialas. Uschia pudess il deficit statal vegnir anc pli grond e quai pudess provocar dispitas cun l'Uniun Europeica. L'Italia ha tants daivets sco strusch in auter pajais en Europa.

Emprim inscunter en il Canada

L'emprima preschentaziun da Conte è l'inscunter suprem G7 en il Canada. Tar quest inscunter vegn el tranter auter a scuntrar la chanceliera tudestga Angela Merkel ed il president american Donald Trump. Sco emprim vul el «far enconuschent» l'Italia dentant era «procurar per respect» per il pajais.

RR novitads 06:00