Durant la notg s'han verifitgadas las temas da las autoritads da salvament en la regiun da l'Italia Centrala: Oz a bun’ura ha la protecziun civila curregì il dumber dals morts da 159 sin almain 247 persunas. 368 blessads èn fin uss vegnids transportads or da la regiun dad Amatrice ed Accumoli.
Las forzas da salvament tschertgan vinavant cunquai che bleras persunas sa chattan anc adina sut las ruinas. Ed anc adina n'èn intgins lieus da la regiun betg cuntanschibels.
- Dapi il terratrembel da la notg dal mardi sin mesemna è vegnida squassada la regiun da passa 250 terratrembels posteriurs.
- Ils quatter lieus Amatrice, Accumoli, Pescara del Tronto ed Arquata del Tronto èn pertutgads da las pli grondas devastaziuns. Parts da lur quartiers na datti betg pli.
- Il terratrembel principal aveva squassà la terra da l’Italia centrala cun ina fermezza da 6,2. El aveva ses epicenter en ina profunditad da mo diesch kilometers sut terra.
RR novitads 10:00