Curt suenter ch'il schef da partida da l'ÖVP, Sebastian Kurz, ha annunzià il mardi da vulair tractar cun la partida da dretga FPÖ davart ina pussibla coaliziun, ha annunzià la FPÖ da vulair entrar en discussiun. Quai scriva l'agentura da novitads svizra SDA.
En las elecziuns dal parlament aveva la partida conservativa ÖVP gudagnà cun 31,5% da las vuschs. La SPÖ, la partida regenta cun il chancelier federal Christian Kern, ha pers marcantamain (be anc 26,9%). La terz ferma partida era vegnida la partida da dretga FPÖ (26%). Ils verd eran schizunt crudads or dal Cussegl naziunal austriac.
Heinz-Christian Strache (FPÖ): «Discurs na sto betg avair fin positiva»
En sia posiziun ha il schef da la FPÖ Heinz-Christian Strache dentant punctuà, ch'ina coaliziun fetschia be senn, sche la FPÖ possia er manar ses cuntegns en la regenza. I dettia bain temas cuminaivels, ma er differenzas fundamentalas.
Uschia ha Strache bain aderì a discurs, dentant laschà avert la fin da quels.
Sebastian Kurz (ÖVP): «Gronda voluntad da midaments per l'Austria»
I dettia blers temas, che fatschentian tant la ÖVP sco er la FPÖ, ha ditg il schef da l’ÖVP Sebastian Kurz il mardi a Vienna: Quai saja da limitar l'immigraziun illegala fin sin nulla, far main attractivs ils sistems socials per persunas che vegnan da l’exteriur e da sbassar las impostas oravant tut per persunas cun entradas bassas.
En pli hajan tuttas duas partidas la gronda voluntad da far midadas e l’Austria haja merità, da survegnir da maniera sperta e speditiva ina regenza nova.
RR novitads 12:00
