L’Austria cloma l’armada en vista als blers fugitivs

Suenter che la Germania ha puspè introduci controllas als cunfins, ha era l’Austria annunzià da vulair controllar pli intensiv ils cunfins dal pajais. Quai ha il chancelier austriac Werner Faymann ditg ad ina conferenza da medias.

Il chancelier austrica Werner Faymann.

Legenda da maletgs: Werner Faymann s’exprima avant las medias davart las novas mesiras. Keystone

Faymann ha declerà da vulair mobilisar 2’200 schuldads che duain assister a la polizia. Las controllas na muntian dentant nagina aboliziun da la cunvegna da Schengen.

Entant vegnan las colliaziuns da viafier tranter la Germania e l’Austria puspè manadas senza disturbis, ha confermà in pledader da las viafiers austriacas. Ed era l’autostrada tranter l’Austria e l’Ungaria è puspè averta.

Germania quinta cun 1 milliun fugitivs

Il vicechancelier tudestg Sigmar Gabriel quinta, che la Germania vegnia a recepir enfin la fin dal onn 1 milliun fugitivs. Enfin uss quintavan las autoritads da la Germania cun 800’000 fugitivs. Quai ha il schef da la partida socialdemocrata da la Germania ditg a l’agentura da novitads tudestga dpa.

RR Novitads 12:00