L'attentader d'Orlando era gia conuschents a la polizia

Tar in’attatga sin visitaders d'in club en la citad americana Orlando èn vegnidas mazzadas 50 persunas. 53 ulteriuras sajan vegnidas blessadas, ha ditg il burgamester d'Orlando Buddy Dyer a las medias. Bleras sa chattian en in stadi critic. Igl è in dals menders «shootings» en ils Stadis Unids.

In attatgader saja entrà la notg enturn las 02:00 en il club ed haja cumenzà a sajettar enturn, ha communitgà il schef da la polizia locala. Plinavant haja l'attatgader prendì tozzels ostagis.

A l'entschatta haja in singul policist cumbattà l'attatgader, suenter sajan dus ulteriurs policists vegnids per gidar. In dad els saja vegnì blessà. A las 05:00 haja il commando spezial lura prendì la decisiun da deliberar ils ostagis.

L’attentader ha para telefonà cun la polizia

L'um ch'ha sajettà giu ier 50 persunas en in club da omosexuals ad Orlando en Florida ha telefonà avant l'attatga a la polizia ed è sa declerà sco part da la gruppa da terror Stadi islamic.

In contact direct na vesa la polizia dentant betg. La polizia n'excluda il mument dentant nagin motiv. Era ina ravgia sin persunas omosexualas saja pussaivla. L'um da 29 onns era burgais american e lavurava tar ina firma da segirtad armada.

Actualmain paucas infurmaziuns

Tar l’acziun hai lura dà plirs morts. L’attatgader è vegnì mazzà. I sa tracta d'in um american cun ragischs afganas, quai rapportan medias americanas. Il figl da geniturs afgans saja naschì il 1986 en l'USA ed haja vivì a Port St.Lucie en Forida.

Anc n'èsi betg cler tge ch'è stà il motiv da l'acziun. La polizia federala americana FBI investighescha pervi d'in act da terror. Tenor la polizia èsi be enconuschent che l'attatgader n'è betg oriund d'Orlando. Apparentamain era el organisà e preparà «fitg bain».

Fin d'emna sanguinusa

Il club era frequentà bain durant la notg da la tragedia. La polizia pleda da radund 300 persunas.

Ina carta geografica che mussa il stadi federativ da Florida. Marcà è il lieu Orlando.

Legenda da maletgs: Il lieu da l'eveniment è stà in club en la citad Orlando en il stadi federativ american da Florida. SRF

Gist suenter l'attatga è il club vegnì barricadà spaziusamain. Er chauns per tschertgar materials explosivs èn stads en acziun. Il burgamester d'Orlando ha pledà d'in crim «fitg terribel».

Pir il venderdi saira aveva quai dà in auter crim sanguinus ad Orlando. Suenter in concert aveva in um mazzà la giuvna chantadura populara Christina Grimmie (22).

RR novitads 14:00 / 17:00+

Mintga di sajettims

En ils Stadis Unids datti bunamain mintga di sajettims. Dapi l’entschatta da l’onn hai tenor gunviolencearchive .org dà dapli che 5’800 morts tras armas da fieu e dapli che 23’000 incidents cun armas da fieu. Malgrà l’aut dumber da morts ha la lobi d’armas fin uss impedì ina pli severa lescha d’armas.