En in’intervista cun l’emettur britannic ITV ha ditg il schef da l’autoritad da polizia europeica Europol, Rob Wainwright, che passa 200’000 sistems da computer en 150 pajais sajan pertutgads da l’attatga internaziunala da hackers da la fin d’emna. E la cifra vegnia damaun – cura che la nov’emna da lavur cumenza – anc a crescher.
Smanatscha da talas attatgas crescha ad in crescher
Perquai pretenda Wainwright, che las autoritads ageschian a moda armonisada sin stgalim internaziunal cunter ils responsabels da quest’attatga. Il mund saja confruntà cun ina smanatscha che daventia adina pli gronda.
Ils computers pertutgads èn vegnids attatgads dad in program donnegius cun ina uschenumnada «funcziunalitad da verm». Quella haja gì l’effect, ch’il program donnegius è vegnì derasà automaticamain e che l’attatga haja pudì sviluppar ina tal effect ferm.
Fora da segirezza era enconuschenta entras il NSA
Ils hackers han para nizzegià ina fora en il sistem da segirezza, ch’era gia vegnida identifitgada dal servetsch secret da l’exteriur american, il NSA. La fora era vegnida descritta en documents secrets, ch’èn suenter vegnids derasads illegalmain.
Microsoft aveva bain savì reagir cun ina mesira da segirezza, che scumandava a la software da sa derasar vinavant. Tenor ils experts n’avevan dentant anc blers utilisaders betg installà quella mesira.
Attatgaders betg enconuschents han duvrà «ransomware»
Per lur attatgas en tut il mund han il hackers duvrà ina software donnegiusa, uschenumnada «ransomware»: Tar talas attatgas codeschan hackers datotecas da lur victimas e pretendan daners per puspè decodar ellas.
Tgi che stat davos questas attatgas n’è betg enconuschent.
RR novitads 15:00
