Siglir tar il cuntegn
cuntegn

Exteriur L'assassin da Jo Cox è vegnì sentenzià

Tschintg mais suenter il mazzament da la delegada britannica Jo Cox, ha la dretgira penala a Londra sentenzià l'assassin a praschun per vita duranta. En vista a l'act crudaivel n'aja l'um nagina schanza da vegnir liber, hai gì num. La procura publica aveva valità l'um sco radical da la dretga.

La delegada britannica Jo Cox trapassada.
Legenda: La delegada britannica Jo Cox trapassada. Keystone

Jo Cox, delegada da la partida Labour, era s'engaschada ferm per restar en l’Uniun europeica. In'emna avant las votaziuns dals 23 da zercladur è la dunna da 41 onns vegnida assassinada durant in’ura da consultaziun cun la populaziun en la regiun da la citad Leeds. L'attatgader aveva clamà «Il prim la Britannia», sajettà sin la dunna e stilettà ella. La dretgira penala a Londra ha uss sentenzià l'um da 53 onns pervi da quest mazzament a praschun per vita duranta. Ils giuraders èn vegnids perina gia suenter sa cussegliar stgars duas uras.

In schoc per la Gronda Britannia

La campagna dal 'Brexit' era vegnida franada suenter il mazzament. Enconuschents politichers avevan proclamà da tegnair en frain la gritta, en ina debatta politica tutgia era vuschs criticas.

Jo Cox era cunzunt s'engaschada per ils dretgs dals fugitivs, in tema principal era en las debattas per e cunter il Brexit. La Gronda Britannia ha votà finalmain cun bunamain 52% per in sortida da l'UE.

RR novitads 15:00