L'armistizi en Siria è rut

Malgrà l'armistizi ch'era ì en vigur quest'emna, hai puspè dà ferms cumbats en Siria. Ils cumbats tranter truppas da la regenza e rebels, hajan gì lieu en l'ost da la chapitala siriana Damascus.

Autos ch'ardan e persunas che van per las vias enturn.

Legenda da maletgs: L'armistizi n'ha betg tegnì fitg ditg. Keystone

Tgi che ha sco emprim rut l'armistizi n'è dentant betg cler. Medias simpatisantas da la regenza reproschan als rebels d'avair attatgà sco emprims. Tenor ils rebels, hajan las truppas da la regenza rut sco prims l'armistizi.

Ils Stadis Unids e la Russia avevan negozià in armistizi per la Siria. En lur bratscha giaschia la speranza da puspè pudair cumenzar discurs per obtegnair pasch en il pajais. En la guerra sajan mortas dapi il cumenzament da la guerra, la primavaira 2011, passa 300'000 persunas.

La guerra che cuzza gia dapi tschintg onns en Siria saja sa sviluppà tar ina crisa mundiala La Svizra haja dapi il cumenzament da la guerra piglià diversas mesiras.

L'agid svizzer en Siria

250 milliuns francs ha la Svizra fin ussa mess a disposiziun per gidar en Siria la populaziun che pattescha da la guerra. Quai resulta dal rapport dal cussegl federal pertutgant l'engschi svizzer en Siria.

Dapi il settember 2013 haja la Svizra ultra da quai possibilità a 4200 Sirianas e Sirians d'immigrar sin via segira en Svizra. Sin plaun europeic saja la Svizra s'engaschada per dapli solidaritad, quai vul dir, che las incumbensas per surventscher la crisa da fugitivs vegnian repartidas a moda pli gista sin tut ils pajais.

RR novitads 14:00