Siglir tar il cuntegn
Inhalt

Exteriur Kabul: Passa 80 morts tar attatga a bumba

Ina bumba devastescha en la chapitala afgana il quartier da diplomats, mazza passa 80 persunas e blessa passa 350 persunas. Quai conferma in pledader da la regenza a Kabul.

Las lavurs da rumida davant l’ambassada tudestga a Kabul.
Legenda: Las lavurs da rumida davant l’ambassada tudestga a Kabul. Keystone

Ina bumba, ch’era probablamain zuppada en in camiun cun aua, mazza tar sia detunaziun en il quartier dals diplomats passa 80 persunas. Passa 350 èn vegnidas blessadas. Quai conferma il pledader dal ministeri da sanadad. Pli che 50 vehichels ed autos èn vegnids destruids, chasas èn devastadas.

Il ministeri da l'intern afgan ha comunitgà cifras dad unfrendas pli bassas - cler è dentant, che la cifra da morts e blessads crescha dapi las primas infurmaziuns ad in crescher.

L'attentader da suicidi ha tutgà amez il traffic da bun'ura

L'attentat è capità la damaun las 08:30, cura che millis da civilistas e civilists eran sin il viadi a lavur. La detunaziun è stada en la vischinanza dal plaz Sanbak, ina gronda rundella da traffic datiers da blers ministeris afgans. En il quartier segirà severamain èn bleras ambassadas, il palazi dal president afgan ed il quartier principal da la Nato.

Devastaziun totala.
Legenda: Kabul suenter l'attatga – ina bumba devastescha il quartier da diplomats, mazza passa 80 persunas e blessa passa 350. Keystone

Reacziuns e confermas suenter l'attatga

L'ambassada tudestga è vegnida donnegiada fermamain. Donns èn er vegnids rapportads da l'ambassada da la Frantscha, da la China, l'India e la Tirchia.

Da ses quartier principal a Kabul ha la Nato condemnà l’attentat cun pleds ferms. L’act resplendia la «natira barbaria» dals malfacturs e lur indifferenza totala envers civilistas e civilists. En in tweet han ils talibans snegà lur responsabilitad vi da l'attatga, ch'els «cundaneschan mintga attentat sco quest che causa unfrendas civilas».

Tenor las autoritads sa tractia dad ina da las attatgas pli devastantas en la chapitala afgana, l'otgavla en seria mo durant quest onn.

RR novitads 09:00++