Juncker: «UE è en ina crisa existenziala»

Il president da la cumissiun da l’Uniun europeica Jean-Claude Juncker vesa l’UE en ina crisa existenziala. Ils 28 stadis commembers discurrian memia savens dals agens interess naziunals, ha ditg Juncker en ses pled avant il parlament da l’UE a Strassburg.

purtret da Jean-Claude Juncker

Legenda da maletgs: Il president da la cumissiun da l'UE ha pledà davart la situaziun da l'Uniun europeica. Keystone

«Il dumber da las spartas nua che nus lavurain ensemen, è memia pitschen», ha ditg Juncker. El renfatscha a las regenzas da dar memia savens la preferenza ad interess naziunals ed ha avertì d'uschia giugar en ils mauns dals populists.

«  Populissem na schlia betg ils problems - il cuntrari, populissem creescha problems. »

Jean-Claude Juncker
president da la cumissiun da l'UE

Cun guardar sin las contractivas da sortida cun la Gronda Britannia ha Juncker suttastritgà che Londra na survegnia betg in martgà naziunal à la carte. Per la Gronda Britannia dettia l'access liber al spazi economic da l'UE mo lura sche la regenza britannica acceptia la libra circulaziun dals burgais da l'UE.

Ils 27 stadis restants da l’UE senza la Gronda Britannia s’inscuntran venderdi proxim per discutar co vinavant.
Juncker vul dar schlantsch a l’economia europeica ed ha perquai dublegià il program d’investiziuns sin uss 630 milliardas euros fin il 2020.

RR novitads 11:00