Siglir tar il cuntegn
Inhalt

Exteriur Jemen: Anteriur president Saleh mazzà

Ali Abdullah Saleh è vegnì mazzà tar cumbats a Sanaa curt suenter avair midà vart en il conflict. Suenter emprimas infurmaziuns anc betg confermadas annunzia uss la partida da l’anteriur president jemenit che quel saja vegnì mazzà tar cumbats en il sid da la citad.

Portrait Saleh amez glieud e militar.
Legenda: L’anteriur president jemenit Ali Abdullah Saleh – qua (cun egliers) durant in’occurrenza da sia partida il schaner a Sanaa. Keystone

Be dus dis avant sia mort aveva l’anteriur president Ali Abdullah Saleh desditg als rebels Huthi l’allianza. Ils Huthi vegnan sustegnids da l’Iran. Al medem mument aveva Saleh annunzià da vulair tractar cun la coaliziun militara che vegn manada da l’Arabia Saudita.

Conflict è escalà tranter anteriurs alliads

Sinaquai han ils rebels Huthi renfatschà a Saleh dad esser in auttraditur. En cumbats tranter ils anteriurs alliads, tranter ils cumbattants da l’anteriur president Saleh ed ils rebels Huthi, èn morts la fin d’emna a Sanaa plirs tozzels da persunas.

Rebels sin in pick-up amez via.
Legenda: Rebels Huthi il glindesdi a Sanaa. Keystone

Er il glindesdi haja quai dat tenor perditgas a Sanaa pliras attatgas or da l’aria. Tenor la SDA sajan vegnids attatgads lieus en vischinanza da l’eroport ed il ministeri da l’intern. La citad da Sanaa vegn controllada tenor la SDA dals rebels Huthi.

Crisa umanitara greva en il Jemen

Tenor ils observaders vegn manada en il Jemen ina guerra da substituziun tranter las duas pussanzas regiunalas Iran ed Arabia Saudita. Dapi che l’Arabia Saudita è intervegnida l’onn 2015 a la testa dad in’allianza militara en il conflict da pussanza en il Jemen èn mortas almain 8’750 persunas.

La populaziun patescha betg be da la guerra ed ina bloccada economica da la coaliziun da l’Arabia Saudita, ma er dad ina setgira. 20,7 milliuns persunas dovran agid umanitar.

RR novitads 15:00